Boroknya Surabaya tahun 1940-an, Kampung-Kampung Kotor, Kali Bacin, Banyak Pemadat, Perempuan Jalang Berkeliaran

Boroknja Soerabaja

Laporan Sin Po - Maart 1940

Oleh banjak penoelis sering diloekisken kamenterangan dan karameannja kota Soerabaja; boeat pendoedoek dari kota-kota ketjil dan sepi atawa dari laen tempat jang djaoe, Soerabaja ada berharga boeat dikagoemin; kota dagang dan pelaboean jang terbesar di Oost-Java, tourist tida perna liwatken begitoe sadja di ini Badjoel.

Itoe tram-listriek jang liwat di tengah-tengahnja karepotan dari rerotan auto's itoe toko-toko dengen gedongnja jang modern; itoe Gouverneurkantoor jang keren; itoe kantoor Gemeente jang sering ditjomelin; itoe pelaboean jang selaloe riboet; itoe noni-noni tjantik jang djalan di sepandjang Toendjoengan ― semoeanja didjadiken oleh-olehnja orang loear kota.

Tetapi bila orang maoe boeang temponja boeat mengoendjoengin di sampingnja itoe semoea kabagoesan, orang aken dapetken avontuur heibat dan black point jang menggidiken boeloe badan, jang, biarpoen pendoedoek kota sendiri soengkan dan tida brani mendeketin.......

Marilah sekarang kita oendjoeken dimana sarang-sarangnja kadjahatan dan kamesoeman jang Soerabaja boeat sakean taon tida perbaekin.

Dimana kembang-latar megar?

Kaloe tempo soeda sore, prampoean-prampoean djalang jang pakein dirinja japon-japon berwarna dan poles moekanja begitoe roepa, meroepaken kembang-kembang latar jang megar di moeka kampoeng kaloejoeran di sepandjang roemah-roemahnja pendoedoek Tionghoa.

Orang bisa salah tebak, bahoea pendoedoek Tionghoa ada getol sama ini djiwa-lebihan; tetapi sabenernja ini prampoean-prampoean djalang speciaal reserveer dirinja boeat anak-anak kapal jang saban sore dilepasken di tengah-tengahnja kota jang padet pendoedoek koelit berwarna.

Kadjadian-kadjadian tjilaka sering dialamken oleh pendoedoek baek-baek. Matroos jang anggep kampoeng Tionghoa ada sarangnja djiwa lebihan, maka kaloe soeda terlepas dari tempo kerdja, dateng gedor-gedor roemah orang boeat mentjari.......... djiwa-manis.

Malahan perna kadjadian satoe matroos nerobos masoek di gedongnja Hsing Chung Hui dan tjoba ganggoe damesleden jang berkoempoel di sitoe. Ini kadjadian ada logisch, sebab djoestroe di sabelah gedongnja Hsing Chung Hui ada kampoeng jang terkenal djadi sarangnja prampoean latjoer, jaitoe kampoeng Kebon Kalianjar.

Kampoeng Kebon ada ditjap sanget mesoem, sahingga pendoedoek baek tida brani kaloear masoek di sitoe, boekan sadja di dalemnja itoe kampoeng ada sanget kotor dan poeloehan prampoean latjoer jang brutaal ada mengerem, tetapi ratoesan pendoedoek jang sopan ada tinggal mengiterin di loearnja itoe sarang, hingga membikin „gelap" boeat orang tida toermaksoed djahat, katjoeali matroos-matroos sadja jang bisa lenggang-sikakpoa masoek kaloear di sitoe.

Kampoeng Kebon jang djadi sarangnja prampoean latjoer, orang bisa kasomplok matanja bila djalan di straat Djagalan, satoe straat dengen banjak tinggal pendoedoek Tionghoa dan toko-toko Indonesier; malahan ini straat meroepaken lijn jang penting boeat pamoeda-pamoeda: kerna Djagalan sampe Pasarbesar Wetan ada djadi pangkalannja Hsing Chung Hui, H. C. T. N. H. dan Sportvg. "Tiong Hoa".

Prampoean-prampoean djalang dari Kampoeng Kebon kliwat brutaal, kaloe katemoeken pamoeda-pamoeda jang liwat di Djagalan sering dikaokin setjara katerlaloean. Perkatahan-perkatahan mesoem saban sore kadengeran menjogok dikoepingnja roemah tangga di deket sitoe.

Selaennja Kampoeng Kebon, prampoean latjoer djoega bersarang di Kampoeng Bibis jang saban malem moebal kaloear ka djalanan Slomprettan, hingga itoe djalanan jang tida begitoe penting seperti Djagalan, mendjadi soenji saking soengkannja orang-orang jang djalan di sitoe.

Kramat Gantoeng atawa Kapatihan dimana doeloe banjak, tinggal pendoedoek sopan dan saban sore atawa malem banjak orang liwat di sitoe, sekarang djadi sepi, kendatipoen verkeerspolitie soeda gebah penaek sepeda atawa kandaran ketjil moesti liwatin ini djalanan. Kerna sekarang, di sini teroetama di seblah barat ada banjak roemah jang penoe dengen moentji-moentji, hingga di kanan kirinja jang ada tinggal roemahtangga baek-baek saking tida betahnja pelahan dengen pelahan singkirken diri. Begitoe di straat Peneleh djoega tida koerang banjaknja roemah-roemah prampoean latjoer.

Orang-orang Tionghoa jang pergi ka koeboeran djarang terloepoet dari ganggoeannja prampoean-prampoean latjoer jang bersarang di straat-straat deket koeboeran Kembang Koening: jaitoe Tamarindelaan, Pasar Kembang dan Banjoeoerip......

Sarang jang djaoe dari kampoeng Tionghoa jaitoe sarang berdansanja koepoe-koepoe malem di Tandjong Perak jang saban malem poeloean ekor lagi bergoeletan dengen klasi-klasi. Tetapi marika tida tinggal di sana, tempat tinggalnja ada di Kampoeng Kebon atawa Tamarindelaan.

Hotel-hotel ampir 85% ada terdiri dari hotel dengen boengah-raja, hingga boeat tetamoe dari loear kota jang dateng di Soerabaja kaloe tida djaoe-djaoe hari preksa doeloe hotel jang sopan bisa kasasar masoek di hotel jang penoe prampoean latjoer dan bisa bikin tjilaka seantero malem!

Begitoe banjak sarang pelatjoeran, jang djoestroe mengerem di tengah-tengahnja Kampoeng Tionghoa, bikin koran-koran di Soerabaja dan pendoedoeknja tida abis mengarti: bagimanatah tjaranja politie dan bestuur bekerdja boeat bersiken ini sarang-sarang meroesak katentremannja pendoedoek di sakiternja?

Lebih-lebih tida mengarti kita denger itoe oetjapan "Membasmi prampoean latjoer di Indonesia", jang boeat oepama kota Soerabaja sadja tambah boelan djoemblahnja tambah naek keras.

Sarangnja pantjalongok.

Djalanan-djalanan jang sempit kotor, berbaoe dan roewet antara kampoeng-kampoeng dari Panggoeng-Kalimati Koelon-Kembang Djepoen sampe di Gili meroepaken sarang jang paling enak boeat kaoem penjebrot. Satoe kali sebrot dan linjapken diri di sala-satoe kampoeng jang terdapet di sitoe biarpoen dikepoeng ratoesan politie tentoe soesa ditjekel batang lehernja.

Di ini djalanan-djalanan paling sering terdjadi pentjopetan-menjolok-mata.

Tida perdoeli sama ratoesan orang jang menjaksiken; tida perdoeli di waktoe tengahari bolong jang rame; tida perdoeli di sitoe ada orang politie, kaloe toekang sebrot maoe bekerdja, bisa bekerdja kliwat enak dan tentrem.

Satoe 'ntjek dari Sidoardjo jang maoe belandja di toko Panggoeng, dengen setjara jang amat menjolok mata, topi jang dipake di atas kapala dengen enak-enakan di..... sebrot oleh pantjalongok, hingga bikin itoe 'ntjek djadi bengong saking kagetnja seperti disamber gledek di tengahari bolong. Dan ..... banjak orang jang meliat ini "drama", tida satoe ada jang brani tangkep atawa tjega itoe toekang sebrot!

Politie agent satoe waktoe moesti singkirken diri kaloe nampak banjak toekang tjopet maoe djalanken rolnja, sebab perna kadjadian, satoe politie agent ditikem mati waktoe tjoba tangkep satoe penjopet saboek-koelit.

Penjopetan jang koerang adjar dari Panggoeng-Kembang Djepoen - Songojoedan - Kalimati-Gili ada terdiri dari toekang-toekang tjopet jang oeloeng dan teratoer hingga biarpoen saban hari koran-koran gembar-gembor toch sia-sia.

Penggawe-penggawe toko di itoe djalanan jang ampir saban hari menampak penjopetan atawa penjebrotan jang katerlaloean, tida brani rapport sama politie apalagi boeat menangkep sendiri, sebab bahajanja ada besar.

Pantjalongok ini kabanjakan terdiri dari bangsa Madoera, jaitoe kaoem koeli-koeli jang bajarannja amat sedikit.

Djikaloe di ini complex-complex ada bersarang toekang sebrot jang brutaal, begitoepoen di pasar Pasar Toeri, adalah di Slomprettan, dimana autobussen ada dipake sebagi halte, ada banjak koeli-koeli type badjingan jang mengganggoe kasenangannja penoempang bus.

Kampoeng - kampoeng jang kotor.

Kampoeng-kampoeng di Soerabaja ada penting, sebab dengen kaloear-masoek kampoeng, pendoedoek kota jang moesti kadjaoean kaloe djalan di straat-straat djadi dapetken djalanan jang lebih deketan.

Tetapi kaloe pendoedoek jang mempoenjain idoeng atawa wadoek tempat makan, lebih senang pilih djalanan jang djaoe dan rame.

Malahan kaloe di waktoenja moesim oedjan, nadjis manoesia naek ka daratan dan tinggal sampe kering di atas djalanan. Got dimana ada mengalir aer dari Sidonipa via Kampoeng Seng (doeloe djoega djadi sarangnja pelatjoeran, tapi sekarang soeda moelain dioebrak-abrik) teroes katemoeken got besar di Kapasan, djoestroe ini pertemoean ada di betoelan moekanja Boen Bio, hingga bebaoean blenek ampir saban pagi dan sore moesti disedot boeat leden Boen Bio atawapoen leden dari Khong Kauw Hwee jang sering dateng di sitoe.

Di kampoeng-kampoeng teroetama jang banjak tinggal pendoedoek bangsa Madoera, seperti dari wates Sidonipa, Sidodadi, Srengganan, Girikan, Tenggoemoeng dan kampoeng-kampoeng dari ini bagian boeat orang jang poenja idoeng, tentoe aken tekep teroes idoengnja sampe tida bisa bernapas saking baoenja jang kliwat....... sedap dari nadjis!

Dimana aliran-aliran aer dan dimana tempat-tempat jang terboeka, kaloe di sitoe ada banjak tinggal orang-orang Madoera, tentoe itoe tempat-tempat didjadiken kakoesnja, hingga kotoran manoesia terdapet katjetjeran di sana sini.

Boekan sadja berbaoe boesoek dari lantaran nadjis jang berhamboeran, tetapi djoega pemandangan jang mesoem dan kotor dari tempat tinggalnja orang-orang Madoera. Malahan saban-saban djoega menimboelken kariboetan dan hoeroe-hara jang bikin laen pendoedoek djadi koerang aman.

 Kabiasahan orang Madoera sering "mengendon" ka empernja orang-orang laen tjoema boeat...... berak, hingga biarpoen toekang-sapoe-kotoran dari Gemeente bisa djadi tobat.

Kampoeng-kampoeng jang tida dioeroes kabersihannja, djoega terdapet di kampoeng-kampoeng dimana kaoem pantjalongok ada tinggal jaitoe poeloehan kampoeng jang menghoeboengken Pasar Bong-Kembang Djepoeng-Sambongan-Kalimati Koelon dan Pabean-Songojoedan.

Di Kampoeng-kampoeng Gembong-Kapasan Boenbio-Bokland sampe di Gembong Sawah tida bisa tida boeat ditjelah kakotorannja, malahan saban-saban di kampoeng-kampoeng Gembong Sawah pendoedoeknja sering diganggoe maling.

Malahan masi banjak bagian-bagian jang koerang menarik hati boeat dikoendjoengin oleh tetamoe-loear-kota Soerabaja, jang saban dateng tida perna diadjak ka ini bagian-bagian mesoem, sebab kaloe moesti boeang temponja ka ini daerah, tentoe djadi katjele.

Di sini kita perloe tambahken jang blakangan ini kali Girian jang terkenal batjin baoenja, saking seringnja di-ojok-ojok,oleh Gemeente soeda diperbaekin. Banjak kampoeng jang bebrapa taon doeloe kaloe oedjan djadi rawa jang berloempoer sekarang soeda banjak mendingan.

Sebagian kita berikoetin gambar-gambar dari sarang-sarang kamesoeman jang pendoedoek Soerabaja sendiri tida perna atawa djarang sekali mengindjek.